Газета "Гомельскі шкловар"

Работнікі ААТ "Гомельшкло", жыхары мікрараёна Касцюкоўка з размахам адзначылі 80-годдзе Перамогі савецкага народа ў Вялікай Айчыннай вайне.

Напярэдадні гэтай вялікай даты ў мікрараёне Касцюкоўка прайшлі мітынгі.

Каля помніка на брацкай магіле савецкіх воінаў у мікрараёне Касцюкоўка г.Гомеля сабраліся работнікі ААТ "Гомельшкло", члены першаснай арганізацыі ААТ "Гомельшкло" Беларускага грамадскага аб'яднання ветэранаў, работнікі прадпрыемстваў і арганізацый мікрараёна, жыхары мікрараёна Касцюкоўка, навучэнцы навучальных устаноў.

У час мітынгу выступіў кіраўнік спраў адміністрацыі Чыгуначнага раёна г.Гомеля Станіслаў Чэмезаў. Ад кіраўніцтва, працоўнага калектыву і ветэранаў працы ААТ "Гомельшкло" ўсклалі вянок і кветкі. Памяць загінуўшых ушанавалі хвілінай маўчання. У гонар воінаў-вызваліцеляў быў здзейснены трохразовы зброевы залп.

Затым вялікая чалавечая рака накіравалася да помніка Гомельскім апалчэнцам, да якога былі ўскладзены вянок і кветкі.

Прайшоўшы па вуліцы Міхаіла Ламаносава, прадстаўнікі працоўнага калектыву ААТ "Гомельшкло", удзельнікі мітынгу праз шырока расчыненыя вароты ўвайшлі на тэрыторыю шклозавода. Тут знаходзіліся калона веласіпедыстаў, школьнікі з партрэтамі ветэранаў Вялікай Айчыннай вайны.

Перад удзельнікамі мітынгу выступілі спадчыннікі тых, хто будаваў Гомельскі шклозавод, стаў на абарону яго і Радзімы ў 1941 годзе, хто аднаўляў завод пасля ваеннага ліхалецця — эканаміст планава-эканамічнага аддзела Наталля Козырава і старшыня першаснай арганізацыі ААТ "Гомельшкло" Беларускага грамадскага аб'яднання ветэранаў.

Удзельнікі мітынгу ўсклалі кветкі да помніка шклозаводцам, якія загінулі ў гады Вялікай Айчыннай вайны.

***

З тэрыторыі ААТ "Гомельшкло" стартаваў велапрабег па памятных мясцінах мікрараёна Касцюкоўка. Больш за 50 удзельнікаў велапрабегу - завадчане, школьнікі, жыхары Касцюкоўкі - праехалі па вуліцах, названых у гонар удзельнікаў Вялікай Айчыннай вайны, якія праявілі асаблівую доблесць у бітвах. Гэта вуліца імя Фёдара Лебядоўскага — удзельніка вызвалення Гомельшчыны ад нямецка-фашысцкіх захопнікаў, вуліца імя Пятра Басянкова — Героя Савецкага Саюза, вуліца імя Аляксандра Дурагіна — удзельніка вызвалення Гомеля і Гомельскай вобласці ад нямецка-фашысцкіх захопнікаў.

Памяць герояў ушанавалі хвілінай маўчання. Да мемарыяльных дошак удзельнікі велапрабегу ўсклалі кветкі.

Удзельнікі велапрабегу фінішавалі ля дома ветэрана Вялікай Айчыннай вайны Ніны Мікалаеўны Калабынінай.

З самымі цёплымі пажаданнямі ветэрана павіншавалі генеральны дырэктар ААТ "Гомельшкло", дэпутат Гомельскіх абласнога і гарадскога Саветаў дэпутатаў Пётр Максчымчыкаў, кіраўнік спраў адміністрацыі Чыгуначнага аддзела г.Гомеля Станіслаў Чэмезаў, намеснік генеральнага дырэктара па ідэалагічнай рабоце і сацыяльна-бытавых пытаннях Алла Коршнева, работнікі і моладзь ААТ "Гомельшкло", настаўнікі і школьнікі.

Ветэрану Вялікай Айчыннай вайны ва ўрачыстай абстаноўцы ўручылі медаль "80 гадоў Перамогі ў Вялікай Айчыннай вайне 1941 - 1945 гадоў", кветкі, матэрыяльную дапамогу, падарункі.

Калектыў ААТ "Гомельшкло" павіншаваў і былых малалетніх вязняў фашысцкіх канцлагераў, ім таксама ўручаны юбілейны медаль і матэрыяльная дапамога.

***

9 мая жыхароў мікрараёна Касцюкоўка чакала святочнае гулянне на плошчы перад Палацам культуры "Касцюкоўка".

Для жыхароў і гасцей мікрараёна былі падрыхтаваны інтэрактыўная пляцоўка, маляўнічыя тэматычныя выставы навучэнцаў навучальных устаноў, размешчаных у мікрараёне. На сцэне праходзіў канцэрт, падрыхтаваны калектывам філіяла "Палац культуры "Касцюкоўка" Гарадскога цэнтра культуры, іншымі калектывамі горада Гомеля.

Увечары разгарнулася сапраўдная палявая кухня. арганізаваная прафсаюзным камітэтам ААТ "Гомельшкло". Больш за 1000 гасцей свята змаглі бясплатна пакаштаваць смачную салдацкую кашу і гарачую гарбату. За парадкам падчас свята сачылі і дружыннікі ААТ "Гомельшкло". Яркім завяршэннем свята стаў маляўнічы феерверк.